📰 मुक्या प्राण्याला वाचविताना भीषण अपघात : बार्शी पोलीस ठाण्याचे उपनिरीक्षक गंभीर जखमी

📰 मुक्या प्राण्याला वाचविताना भीषण अपघात : बार्शी पोलीस ठाण्याचे उपनिरीक्षक गंभीर जखमी

उरुळी कांचन प्रतिनिधी :

सोरतापवाडी (ता. हवेली) ग्रामपंचायत हद्दीत पुणे-सोलापूर महामार्गावर शुक्रवारी (ता. २२ ऑगस्ट) पहाटे चारचाकी कार व ट्रकचा समोरासमोर भीषण अपघात झाला. या अपघातात बार्शी शहर पोलीस ठाण्याचे पोलीस उपनिरीक्षक महेश अंबादास गलगटे (वय ३६, रा. आष्टी, जि. बीड) गंभीर जखमी झाले असून त्यांच्या कारचा अक्षरशः चुरा झाला आहे.

घटना पहाटे पावणे सहा वाजता सोडतापवाडी येथील अल्फा पेट्रोल पंपासमोर घडली. कार (एमएच २४ वि ९५४०) सोलापूरच्या दिशेने जात असताना अचानक महामार्ग ओलांडणाऱ्या मुक्या प्राण्याला वाचविताना नियंत्रण सुटले. कार दुभाजकाला धडकून थेट विरुद्ध दिशेने येणाऱ्या ट्रकला (एमएच १२ टीवी २८२८) धडकली. अपघात इतका भीषण होता की कारचा अक्षरशः चुराडा झाला. मात्र उपनिरीक्षक गलगटे सुदैवाने जीव वाचवू शकले, तर ट्रक चालक थोडक्यात बचावला.

घटनेची माहिती मिळताच उरुळी कांचन पोलिस ठाण्याचे पोलिस निरीक्षक शंकर पाटील, उपनिरीक्षक प्रवीण कांबळे, सहा. उपनिरीक्षक रमेश भोसले, पो. हवा. सोमनाथ सुपेकर, उद्धव गायकवाड घटनास्थळी दाखल झाले. पोलिसांनी क्रेनच्या सहाय्याने अपघातग्रस्त वाहने बाजूला करून महामार्गावरील वाहतूक सुरळीत केली. गंभीर जखमी गलगटे यांना तातडीने लोणी काळभोर येथील खासगी रुग्णालयात दाखल करण्यात आले असून त्यांच्यावर उपचार सुरू आहेत.