वस्तू परत न घेतल्याने बार्शीतील दुकानाला दणका; ग्राहक आयोगाचा नुकसानभरपाईचा आदेश
धाराशिव/प्रतिनिधी : ग्राहकाने खरेदी केलेली वस्तू परत घेण्यास नकार देत अनुचित व्यापार पद्धतीचा अवलंब केल्याप्रकरणी जिल्हा ग्राहक तक्रार निवारण आयोग, धाराशिव यांनी बार्शी येथील ‘जगदाळे मशीनरी स्टोअर्स’ (प्रो. प्रा. जगदाळे बंधू) यांच्याविरोधात नुकसानभरपाईचा आदेश दिला आहे.
नेमके प्रकरण काय?
तक्रारदाराने १९ फेब्रुवारी २०२५ रोजी बार्शी येथील शिवाजी आखाडा परिसरातील संबंधित दुकानातून सुमारे १,८०० रुपयांचा ‘आयरन किंग कॉर्डलेस’ ड्रिल किट खरेदी केला. खरेदीवेळी ग्राहकाने पक्क्या बिलाची मागणी केल्याचा दावा तक्रारीत नमूद आहे; मात्र ते देण्यात आले नसल्याचेही तक्रारदाराचे म्हणणे होते.
खरेदी घाईत झाल्याने तक्रारदाराने अर्ध्या तासाच्या आत वस्तू परत करण्याचा प्रयत्न केला. मात्र दुकान व्यवस्थापनाने ती वस्तू परत घेण्यास नकार दिल्याने ग्राहकाने आयोगाकडे दाद मागितली. या प्रकरणात तक्रार क्र. ३८/२०२५ दाखल करण्यात आली होती.
आयोगाचा निर्णय
सुनावणीदरम्यान तक्रारदाराच्या वतीने अॅड. मोईन बी. शेख यांनी पुरावे सादर केले. युक्तिवाद ग्राह्य धरत आयोगाने २६ फेब्रुवारी २०२६ रोजी तक्रारदाराच्या बाजूने आदेश पारित केला.
आदेशानुसार —
तक्रारदाराने मूळ पॅकिंगसह ड्रिल किट संबंधित दुकानाकडे परत करावे.
वस्तू प्राप्त होताच दुकानदाराने खरेदी किंमत १,८०० रुपये परत करावी.
मानसिक त्रासाबद्दल ३,००० रुपये नुकसानभरपाई द्यावी.
तक्रार खर्चापोटी आणखी ३,००० रुपये अदा करावेत.
ग्राहक हक्कांबाबत संदेश
ग्राहक संरक्षण कायद्यांतर्गत ग्राहकांना योग्य सेवा व पारदर्शक व्यवहाराचा अधिकार आहे. वस्तूविक्रीत त्रुटी आढळल्यास किंवा अनुचित व्यापार पद्धतीचा अवलंब झाल्यास ग्राहक आयोगाकडे दाद मागता येते, याची पुन्हा एकदा नोंद या निर्णयातून झाली आहे.
